ప్రాభాతి

రేగిన ముంగురుల్ నుదుట ప్రేమ సుధా మధురైక భావముల్
ప్రోగులు వోయగా నిదురపోవు దయామయి! నా యెడందలో
ఆగక పొంగు స్వాప్నిక రహస్యము లెవ్వియొ నీదు గుండెతో
దాగుడు మూత లాడ సరదా పడుచున్నవి కన్నులెత్తుమా!
ఈ గిజిగాని గూడు వలెనే మలయానిల రాగడోలలో
నూగుచునుండె నా తలపు లూరక; నీ కబరీ భరమ్ములో
మాగిన కేతకీ సుమ సమంచిత సౌరభవీచి పై పయిన్
మూగి స్పృజించి నా హృదయమున్ కదిలించుచునుండె ప్రేయసీ
రాగము నందుకొన్నది తరంగిణి; బాలమరీచి మాలికిన్
స్వాగతమిచ్చె పద్మిని; హసన్ముఖియై మన దొడ్డిలోని పు
న్నాగము కుప్పవోసె [...]

సాంధ్యశ్రీ …

అంజన రేఖ వాల్కనుల యంచులదాటి మనోజ్ఞ మల్లికా
కుంజములో సుధా మధుర కోమల గీతిక లాలపించు ఓ
కంజ దళాక్షి, నీ ప్రణయ గానములో పులకింతునా మనో
రంజని బుష్పవృష్టి పయి రాల్పి నినున్ బులకింప జేతునా
క్రొంజిగురాకు వేళుల కురుల్ తడియార్పుచు గూరుచున్న య
భ్యంజన మంగళాంగి జడలల్లుదునా, మకరంద మాధురీ
మంజుల మామక ప్రణయ మానస భావనలే ప్రపుల్ల పు
ష్పాంజలి జేసి నీ యడుగులందు సమర్పణ జేసికొందునా
సంజ వెలుంగులో పసిడి చాయల ఖద్దరు చీర గట్టి నా
రింజకు నీరు వోయు శశిరేఖవె నీవు [...]

అద్వైతమూర్తి

చూచెదవేలనో ప్రణయ సుందరి, కాటుక కళ్ళలోని యా
లోచనలేమిటో హరిణ లోచని నీ చిరునవ్వులోని సం
కోచములెందుకో కుసుమ కోమలి నీ మధురాధరమ్ములో
దాచుకొనంగ నేటికి సుధామయ సూక్తి కళావిలాసినీ
మనదాంపత్యము సత్యమౌ ప్రణయ సామ్రాజ్యమ్ములో లోతులన్
గనియెన్ సాగెను భాగ్యనౌక కవితా కాళిందిలో నవ్య జీ
వన బృందావన దివ్యసీమ విహరింపన్ రమ్ము నే కొల్ల గొం
దును నీ కోమల బాహు బంధనములందున్ కోటి స్వర్గమ్ములన్
భావోద్యానమునందు కొత్త వలపుం పందిళ్ళలో కోరికల్
తీవెల్ సాగెను పూలు బూచెను రసాద్రీ భూత తేజమ్ముతో
నీవే నేనుగ నేనెనీవుగ లతాంగీ [...]